政情：阿姐爆唐唐搞西九冇影
特首參選人唐英年離開政府前，做過三年西九管理局董事局主席，理應接觸過唔少海內外文化人士。不過，八和會館主席兼全國政協委員「阿姐」汪明荃話，佢一直未見過唐唐喎！實情唐唐在任期間做過啲乜呢？真係冇乜人知道。
西九管理局表演藝術政策及管理事務行政總監茹國烈，尋日拉埋阿姐同傳媒聚會。一講到遲啲喺西九搞嘅粵劇表演時，阿姐眉飛色舞，覺得呢次係一個好開始，但亦感慨新光戲院就快結業，令粵劇界少咗個表演場地，相信政府都會極為頭痛。咁究竟唐唐在任西九時做過啲乜呢？阿姐就話佢無見過唐唐，反而現任西九董事局主席林瑞麟就見過一次，但大家交流唔多。
至於另一位特首參選人梁振英（CY），阿姐直言CY喺八和做顧問都有幾年，間中亦會睇粵劇，加上大家都係政協，所以佢都係熟CY多啲，唔知作為選委嘅阿姐最終會提名及支持邊個呢？