政情：黃士心帶隊登岸觀火
康泰旅行社老闆黃士心近年退居幕後，過住悠閒生活，得閒就客串做「生招牌」幫公司帶吓團，之前去過東非睇動物大遷徙，又去過杜拜遊最堂皇嘅帆船酒店，今次佢就揀咗帶團友去睇「雙英」，難道佢想表態支持邊個特首參選人？非也，此「雙英」係台灣藍綠陣營候選人馬英九同蔡英文，黃生係帶團過去觀戰，順便暢遊啲熱門景點。
仲有九日就係台灣選舉，聽講台灣啲酒店同機位都爆到七彩。不過，康泰尋日就推出咗個台灣選舉嘉年華三天考察團，今個月十三日出發，名額三十人，每位約二千七百元，行程包括參加總統府外造勢晚會、票站外觀摩投票情況及直擊勝選之夜，仲去埋早前hit爆嘅《那些年》拍攝點，包括菁桐懷舊車站、去平溪放天燈等。據講，黃生尋日應台灣嘅機構邀請飛咗去台灣考察，順便幫團友探定路。