政情：何兆煒過檔掌聖保祿
公家醫院大國手逃亡至私家醫院，已經唔係新鮮事，近日又有醫管局前高層過檔私家醫院搵真銀。醫管局前行政總裁何兆煒○五年因沙士下台後，○九年幫城大搞獸醫學院，最近又被人挖角撬走，下月會去聖保祿醫院做院長。有醫學界人士話一個私家醫院院長，年薪最少二百幾萬，睇嚟何兆煒今勻可以過番個肥年嘞。
何兆煒尋日大方承認，自己下月就會過檔聖保祿醫院做一哥，但被問到點解唔返去公家醫院做，佢就笑笑口話私家醫院發展係大趨勢，想試吓新嘢。至於係咪高薪挖角，佢就點都唔講，但知情人士話，請得佢老兄復出，人工唔會低。
既然何兆煒過檔，佢嘅太太、仁安醫院婦產科專科名醫董曉方會唔會一齊行動？何兆煒就話唔會嘞，要公私分明喎。佢又話，聖保祿醫院有一大堆醫生都係佢同年讀醫嘅同學仔，依家見番佢哋，一定合作得好愉快。