政情：鄉紳聯盟大報復
前沙田區議會主席兼鄉議局執委韋國洪，早前傳佢因為畀民建聯（民記）嘅暗箭射中，因而意外失落委任區議員，當堂辣慶鄉事派。我哋收到消息，屬於新界東選區嘅九個鄉事委員會，喺前日鄉議局內部會議達成共識，會協調一個代表鄉議局嘅候選人參選九月立法會選舉，唔再為民記抬轎嘅意志十分堅定，今屆登位做新界東票王嘅民記，肯定有排煩。
一班鄉紳今次下定決心戙支旗出嚟參選，除咗因為對自己實力有信心外，更認為一直受到眷顧嘅民記唔單止多謝都冇句，仲竟然一而再、再而三咁剃鄉議局眼眉，除咗最近爆出嘅沙田區篤背脊事件，再講遠啲，民記更喺上屆立法會選舉明搶原本屬於鄉事派嘅區議會功能界別議席，呢個仇大家都記憶猶新。加上北區四個鄉委會喺去年底區議會選舉發起鄉事版「票債票償」運動，足以證明民記同鄉事派之間嘅嫌隙一啲都唔細，所以冰封三尺又點會係一日之寒吖。
消息人士透露，新界東九個鄉委會已經初步同意協調候選人出選，一向主張「以和為貴」嘅鄉議局主席劉皇發亦一反常態，大力支持鄉紳嘅建議，仲語重心長咁同與會眾人講咗句：「知恥近乎勇咪好囉。」就係呢句說話，令到大家明白發叔開綠燈。
韋國洪呼聲最高
我哋問過部分鄉議局中人，暫時呼聲最高可以代表鄉議局出選嘅係韋國洪，佢本人亦講過自己正「非常積極考慮」喺新界東出選。不過，依家只係一月啫，距離九月選舉仲有時間，到時變化係點真係講唔埋，點知到時會唔會有人條氣又唔順，走去西環打小報告o架！
講開團結，離島八個鄉委會就夠晒團結喇，事關南丫島鄉委會主席周玉堂成功連任離島區議會主席，至於之前盛傳會競逐主席嘅發叔女婿余漢坤就意外咁冇參選，到底佢係畀人勸退，定係顧全大局自行退出呢？呢個就要問佢先知喇！