香港冇耐之前發現一隻禽流感死雞，卒之又搞到手起刀落殺雞無數，已經夠晒得人驚啦。點不知深圳仲恐怖，居然有人死於禽流感。確診感染Ｈ５Ｎ１禽流感死亡嘅係深圳寶安區一名巴士司機，隨即觸發深港兩地疫情大恐慌。
發雞瘟危機再一次兵臨城下，咁點算好呢？正常而言梗係拜託官老爺醒醒定定做好把關防疫工作啦，問題係相關官僚未必信得過，而且一旦牽涉內地部門，硬係令人憂心忡忡。
喂，記唔記得沙士瞞疫瞞到死傷枕藉？瞞疫呢家嘢前科纍纍，你都咪話唔討厭。有人甚至咁樣講，國產權威人士一同你話平安，你就應該恐慌；一同你話恐慌，你就應該逃亡。
先介紹一下現時嘅官方講法吖。深圳市疾控中心話喎，禽流感出現基因突變，不過係一個自然現象，目前禽流感傳播風險並無增加，病毒不能人傳人，呼籲群眾毋須恐慌，目前藥物仍有效對抗病毒。深圳市疾控中心又話，分析過禽流感死者嘅病毒基因，病毒同去年從香港野鳥發現嘅病毒基因排序較為相似，冇咁似家禽。之但係咁，死者感染源頭是否來自野鳥，仍待相關部門確定。
係咪真係毋須恐慌呢？不如講講一段插曲。深圳市疾控中心前晚近九時發出電郵，講解有關病例內容，個多小時之後再透過電郵，通知新聞界尋日早上十時召開記者會，不過午夜後又再透過電郵通知記者會延遲舉行，又叫記者不要發布較早前嘅消息內容。即係話，深圳市疾控中心一時一樣，令人無所適從。
喂，防疫工作絕對唔可以拖泥帶水，一定要果敢決斷快狠準。好似殺雞咁吖，唔通你殺一半唔殺一半呀？
港大感染及傳染病中心總監何栢良就話嘞，病毒造成嘅死亡率高，顯示情況嚴重，呼籲市民切勿掉以輕心，處理冰鮮雞要注意衞生，徹底清潔雙手同將雞隻煮熟。
咦咦咦，講到冰鮮雞咯喎，真係唔可以等閒視之。香港食物安全中心證實，寶安沙井疫區方圓十三公里範圍內有一個供港家禽加工場，每日供港冰鮮雞佔內地供貨總數半成，雖然香港政府禁止疫區家禽供港二十一日，不過死者由病發到身亡有近十日輸入疫區冰鮮雞嘅「真空期」。另外，食安中心又冇抽驗冰鮮雞，禽流感病毒隨時由冰鮮雞殺入香港。
簡單咁講，深圳市疾控中心呼籲大家毋須恐慌，功夫茶反而要大聲疾呼，深港兩地政府更加必須金睛火眼打醒十二分精神，防範雞瘟臨城之險。
最最最重要嘅一點係，千祈唔好隱瞞疫情呀，死得人多㗎！