上年政務司司長曾俊華鬍鬚曾炮製史上最廢預算案，最後要派六千蚊息民怨。終於嚟到佢任內最後一份預算案，佢仲會唔會派錢呢？鬍鬚曾尋日出席民安隊慶祝活動，被問到新一份預算案會唔會有措施幫助中產，佢就淨係笑笑口。至於會唔會再派六千蚊，甚至加碼派多啲嘅時候，財爺就叫大家耐心啲等吓喎。即係無閂後門喇。
即使鬍鬚曾上年派錢派到一團糟，但大部分市民其實都希望政府可以繼續派錢，等大家可以幫補吓通脹帶嚟嘅壓力。就連學友社尋日公布嘅去年中學生十大新聞選舉結果，雖然派六千蚊只係排第六位，但已經係本地新聞入面排得最高。其實港府上年賣地收入理想，喺庫房長期水浸同埋九月嘅立法會選舉如箭在弦等情況下，各大政黨應該會逼政府繼續派錢紓困。鬍鬚曾唔敢講實會唔會派錢，唔通又係諗住當預算案又畀全城鬧爆時，再使出呢招撒手鐧？