政情：阿基陰招 派嫻妹鬥嫻姐
今年立法會五個超級議席，由於要經過全港三百幾萬選民投票選出，含金量之高令各黨都虎視眈眈。有「一人黨」稱號嘅民協，一直想透過出戰超級議席衝出九龍西，但人選至今未定。據聞民協唯一立法會議員馮檢基為求自保，決定留守喺老巢九龍西，反而傾向派第二梯隊出戰，就算輸咗都唔會輸自己。九龍城區議員莫嘉嫻就係佢嘅心水人選，所以三月中民協換屆時，極可能由莫嘉嫻（嫻妹）出任主席，繼而向超級議席挑戰。
參選超級議席要十五個現任民選區議員提名至得，民協現時手握十五個民選區議員，扣除參選人唔可以提名自己，民協只要向外借一票，已經夠飛入閘玩超級議席。本來民協諗住由副主席譚國僑出戰，而阿基則繼續喺九龍西直選，點知譚國僑輸咗區議會，如意算盤即刻打唔響。
之後黨內有人游說阿基，叫佢試下出戰超級議席，但據聞阿基唔多願意，擔心自己未必贏到，九龍西嘅議席又無人頂替，到時民協就兩大皆空，所以下屆立法會，都係留喺老巢穩陣得多。有人便提出建議，不如由三十九歲、連贏四屆區議會選舉嘅副主席莫嘉嫻出戰超級議席。
換屆有半年力谷人氣
有民協中常委認為，現時有意參選超級議席嘅泛民人士，清一色男人，就算建制派亦只有工聯會陳婉嫻係女性。莫嘉嫻雖然唔算美人胚子，但近四十歲之齡，絕對係樣貌四正，所以民協內部唔少聲音都覺得，派嫻妹出戰，贏就令民協「翻生」，輸亦唔係大損失，更加影響唔到阿基喺九龍西嘅選情，絕對係刀仔鋸大樹最佳示範。
為咗捧嫻妹上位，民協亦做足工夫，現任民協主席廖成利已經講明，三月換屆時唔會再做主席，寧願畀新人頂上，所以嫻妹做主席機會大增。三月做主席後，距離九月選舉啱啱好有半年，夠晒時間力谷人氣。
但講到尾，呢一招最大得益者唔係莫嘉嫻而係阿基，佢喺九西成功連任，到二○一七又可以繼續「選」特首，啱晒佢口味。