中環出更：雷禮權潮戴幼身呔
潮流日日新，打闊身領呔嘅時代已經過去，一向走在潮流最尖端嘅九巴後人雷禮權（William）親身示範型打幼身呔。卓妮早前喺活動上見到佢，佢罕有地以正經嘅西裝look示人，戴上粗框眼鏡配以西裝及幼呔，斯文得嚟不失型格。
William話，着西裝配粗框眼鏡，大方唔老土。佢自言兩年前開始，已經將屋企個衣櫃嘅闊身呔統統換晒幼身呔，連西裝都換埋窄領款式，仲試過喺英國一次過掃逾百條領呔，眼都唔眨。
除咗呔款之外，William仲好講究顏色，佢鍾愛英國著名品牌Dunchamp London嘅螢光呔，貪佢顏色夠鮮艷奪目，屋企仲備有過二千條螢光色手巾，用來襯螢光呔一絕。之不過，隨住近年復興沉實嘅淨色幼呔，佢惟有暫時將螢光衣物收埋先喇。