中環出更：鄭錦鐘湊孫狼狽為樂
澳門嘅新酒店愈開愈多，今個假期好多人選擇過大海玩。保良局副主席鄭錦鐘（Eric）都同本身係區議員嘅仔鄭泳舜夫婦及三個孫仔過去澳門度除夕，點知孫兒暈船浪，一度狼狽不堪。
齊齊過澳門度除夕
Eric怕人逼人，決定二十八日等大家聖誕後開晒工，先至帶家人出發，連埋傭人，一行九人，夠晒熱鬧。可惜三個孫兒分別只有四歲、二歲及九個月大，搭船過大海時，難抵風浪搖晃，大叫頭暈暈。點知顧得大孫時，細孫又話要去廁所，忙到佢氹氹轉。
一家人好不容易抵達今年啱啱開幕嘅悅榕莊酒店，孫兒即刻醒晒，大孫同二孫睇見有套房泳池，二話不說剝衫跳入去。睇見孫兒咁開心，Eric話辛苦啲都值得。
除咗湊孫為樂，Eric仲自爆養咗好多動物，包括兩隻馬、兩隻大狼狗同埋兩隻貓。佢笑稱，兩隻狗長期駐守屋外，兩隻貓就住喺屋內，所以冇乜衝突發生。