中環出更：鄭重科鼓勵年輕人曬相
珠港青年交流促進會前日就職，咭片皇董事總經理鄭重科（Tony）接任主席，佢仲即場宣布喜訊，話自己剛獲得珠海市政府委任做政協委員，真係雙喜臨門。
榮升主席嘅Tony周身唔得閒，早前忙住打點工展會個展位，今年係第二次參加，仲會競逐工展小姐同服務名牌選舉添。Tony話，佢哋專為市民印製家庭相簿，只要將揀好嘅相交畀佢哋就得。佢咁樣做，係想鼓勵年輕人唔好將影咗嘅相只係放喺電腦度齋睇，好多長輩唔識用電腦，所以應該曬出嚟欣賞。
顏氏姊妹齊現身
講到經濟，Tony坦言歐債危機同通脹對其生意一定有影響，不過佢將業務伸展至全球，仲做埋網上訂購，又將自己做I.T出身嘅經驗套落盤生意度，將系統運作盡量精簡，加快工作效率，降低成本。
至於常務會董顏明潤（Jacqueline）同顏明秀（Candy）兩姊妹就一齊現身，腹大便便嘅Jacqueline依然步履輕盈，今次第二胎嘅預產期係三月，妹妹都戥佢開心。