中環出更：裕華刮台風
位於佐敦彌敦道旺區嘅裕華國貨，每日途經嘅人流高達一百萬人次，上星期四下午更加熱鬧墟冚，事關由台灣駐港機構台北貿易中心及裕華國貨聯合舉辦嘅「台灣文創藝品展」開幕，台港政商界嘅名人雅士現身撐場，盛況空前。新任台北經濟文化辦事處處長朱曦首次公開蒲頭，不過佢轉頭就又奔赴機場返台，認真頻撲。咁多貴賓捧場，裕華第二代包括董事總經理余國春夫婦、細佬余鵬春夫婦及好少出席場合嘅余小春，齊心出動招呼賓客，氣氛好熱鬧。
現身捧場嘅嘉賓數都數唔晒，有亞洲金融集團董事長陳有慶夫婦、港台商貿合作委員會主席李大壯等，光華新聞文化中心主任張曼娟等台灣駐港機構代表亦喺度。現場除咗有台灣美食及水果之外，仲展示咗唔少台灣大師級嘅工藝作品，幾乎將台灣嘅精緻出品一次過呈現。
余小春鍾意釋迦水果
余鵬春話，佢哋兩、三年前已開始派同事走遍台灣，蒐羅各類優質產品，希望令裕華國貨嘅產品更多元化，市場反應都唔錯。好似今次引入嘅屏東富貴柿及牛奶蜜棗就好搶手，成日要補貨。余鵬春家姐余小春就好鍾意釋迦水果，仲即時入貨添！
開幕儀式結束後，台灣國畫大師陳士侯與香港瓷畫會嘅兩位靚女高手現場示範作畫，細心一看，原來其中一位係余鵬春太太Ida，佢學瓷畫已有八年。陳有慶太太陳沈時芬亦醉心瓷畫，尋日拎住嘅靚袋圖案正係自家創作，品味認真獨一無二。
卓妮