添馬艦新政府總部爆發退伍軍人症恐慌，喺裡面返工嘅官員人人自危，連煲呔曾尋日都突然離奇缺席童軍一百周年晚宴，即時惹來政界揣測係咁同孫公同一命運病咗。我哋尋日問過特首辦煲呔曾突然缺席嘅原由，發言人僅稱煲呔曾有啲事，由其他官員代為出席活動，至於問到係咪病咗就冇任何補充。
煲呔曾尋日接受電台訪問時話，明年同下屆政府嘅交接安排係新嘗試，揚言希望成為一個典範，事關佢喺○五年上任嘅時候，同前朝政府可以話係無交接嘅。其實中央根本無諗過畀煲呔曾做呢份工，只不過上任特首因腳痛提早下台，佢先至有機會執死雞啫，依家仲喺度講風涼話。如果上屆政府係有交接嘅話，幾時輪到煲呔曾呢個港英餘孽做特首吖！
佢愈講愈興奮，話香港政治環境要求愈來愈高，喺政治鬥爭更加明顯之下，「無辦法唔學識好多樣嘢」。可惜佢學嚟學去都學唔精，變成九流政治家。