考考大家，防煙門嘅作用係乜？嗱嗱嗱，大家唔好嫌功夫茶問埋咁弱智嘅問題，雖然正常人都知防煙門嘅作用就係防煙，不過都要多此一舉問一問，事關真係有茂里唔知防煙門嘅作用係乜。而呢啲弱智到冇朋友嘅茂里，竟然又係讀飽書嘅專業人士。具體而言，唔知防煙門作用係防煙嘅係葵涌瑪嘉烈醫院負責人，即係肩負救死扶傷神聖任務嘅醫護人員！
件事係咁嘅，曾經有職員向消防處投訴瑪嘉烈醫院防煙門出問題，但係未見改善。本報記者實地視察，發覺醫院主樓地庫三層LG3所有防煙門全部打開，大部分被楔住，有一道門被垃圾桶頂住。另外，該樓層至少兩道防煙門貼上待修標誌。
再考考大家，防煙門點樣先至有效發揮作用呀？冇錯嘞，就係閂門，唔係開門，防煙門全部打開等於自廢武功。打個譬喻吖，濃煙就係賊佬，防煙等同防盜，合理做法梗係閂門，冇理由開門揖盜吖嘛。新政府總部就話貪過癮取名「門常開」啫，防煙門無論如何都要「門常關」。
涉事嘅LG3樓層有醫療用品倉、營養及膳食部、兒奶供應部、被服供應部，以及安放遺體嘅安息居。記者所見，每隔幾分鐘就有職員推住手推車穿越被打開防煙門嘅走廊。院方發言人話喎，殮房附近防煙門被打開係由於外判商運送雜物後忘記關上，已向外判商發警告信。
好嘞，繼續考考大家，防煙門全部打開，醫院算唔算草菅人命呀？計功夫茶話齋，當然算啦，畢竟火燭呢家嘢可大可小，醫院如果缺乏消防意識，起火隨時一鑊熟，病人命仔凍過水。喂，唔好以為功夫茶杞人憂天，旺角花園街四級奪命大火搞到鬼哭神號，正正係消防意識薄弱嘅可怕後果。呢一場火不單止害人不淺，而且搞到香港聲譽不保。
中國城市競爭力研究會公布「中國城市競爭力排行榜」，香港嘅綜合競爭力同成長競爭力雖然排名上升，不過安全城市嘅排名就由過往嘅名列前茅，忽然之間跌出前三十位。研究會解釋，香港安全排名大跌嘅主因係花園街大火導致多人死傷，揭露排檔管理、舊樓安全以及居住擠迫等等問題有待改善。
即係咁，特區政府規管排檔不力，又遲遲無法解決劏房問題，卒之令到香港淪為安全城市不入流。大吉利是講句，假如火災傷者送去瑪嘉烈，碰啱醫院又起火，防煙門全開之下濃煙密布火舌蔓延，點算呢？
所以話啫，好心政府做好規管工作，醫管局亦要勒令全港醫院提高消防意識，唔好害到全人類火燒後欄！