政情：莫樹錦撐孫公留任
教育局局長孫明揚日前證實患上退伍軍人症，雖然病情現已轉趨穩定，但好多人都仲好擔心佢嘅健康狀況，勸佢不如提早「退伍」卸任局長，專心休養身體，不過亦有人撐佢繼續留任喎。
城中著名腫瘤科醫生莫樹錦早前出席一個活動時話，唔擔心孫公嘅健康狀況，皆因退伍軍人症並唔係罕有疾病，佢自己都醫過唔少，又話孫公都就快可以出院，最緊要係好好休養，等身體慢慢康復。對於唔少人都叫孫公提早退伍，佢話自己日日都見唔少肺炎病人，如果一有肺炎就要退休，咪好多人都唔使做嘢？
莫樹錦又話，香港人其實已經好幸福，但依然成日強調唔開心嘅事，應該花多啲時間尋求快樂。佢近日忙於埋首肺癌研究，都冇乜點放假，聖誕同新年終於可以同家人享受寧靜假期，同埋打佢最愛嘅高爾夫球。