政情：怪醫無懼做「老」竇
有「怪醫」之稱嘅立法會議員梁家騮九月結婚後，火速「造人」成功，「騮Ｂ」明年二、三月出世。梁醫生以近五張高齡做老竇，卻出奇淡定：「有乜好驚啫，都咁大個人！」
香港西醫工會前晚喺會展舉行周年晚宴，逾二百醫生齊慶祝聖誕夜。告別王老五生涯嘅怪醫單拖赴會。佢話同太太「各有各玩」。首次做爸爸，怪醫定過抬油，無叫老婆戒口，又由得佢做粗重嘢：「年年咁多ＢＢ出世，唔驚得咁多。」
「星屑醫生」歐陽英傑（Jeff）就擔任晚宴司儀，見佢一身型仔打扮，貫徹潮醫本色，歐陽太太就喺台下打氣，表現恩愛。眨眼又一年，Jeff不忘放假hea吓，本來諗住去蘇梅島或馬爾代夫，打聽之下，原來團費要二、三萬，沖繩較平亦要萬幾蚊。去沖繩？唔驚輻射咩？Jeff就話，生老病死係閒事，有得玩先係最重要喎。