政情：李太難忘露營見熊
今個聖誕好凍，不過香港女童軍為慶祝九十五周年，無懼寒風，喺西貢搞咗個五日四夜嘅國際大露營，近千位來自本地同內地、澳洲、日本、韓國、菲律賓等地嘅女童軍喺戶外齊齊度過一個難忘聖誕，場面墟冚。
香港女童軍國際事務總監兼籌委會主席李周美枝細細個就參加女童軍，仲喺美國郊區遇上黑熊，好彩導師教佢哋唔好郁就冇事，最終只係虛驚一場。
今次李太一早為營友準備好毛氈，因為驚來自熱帶地區嘅參加者怕凍，點知最怕凍嘅原來係來自丹麥嘅營友，佢哋第一時間排隊攞毛氈，原來丹麥開慣暖氣，所以佢哋唔捱得凍。
名譽副會長兼籌委會副主席朱鄧麗萍同先生朱繼陶及囡囡朱紫嬈（Khloe）一家嚟撐場，Khloe仲以歌手身份為大會獻唱。佢話自己細個都有跟女童軍去露營，覺得好辛苦但好好玩。
同場仲有香港總監彭徐美雲同先生彭曉明，彭太話今次露營以環保為主，會將廚餘用作堆肥，又將膠餐具回收清潔後再用。佢好感激一眾女童軍盡心盡力幫手，感到天氣雖凍，但大家內心熾熱。