政情：周一鑊外遊玩避世

缺席西醫工會晚宴

一首拉咪嘅《忘不了你》，搞到周一鑊畀人話係卡通片《叮噹》入面嗰個技安，不過，一直以嚟都有好多疑似周一鑊嘅地下粉絲，暗地裏為周一鑊平反，話周一鑊之前出席醫學界活動嘅時候，唱得唔係咁o架，佢哋又讚周一鑊把聲夠厚，如果轉唱英文歌或者歌劇會好好多，至於上次點解會唱成咁，都只係揀錯歌啫。點知前日聖誕節西醫工會又搞周年晚會，周一鑊竟然無到，大家無機會見識佢嘅真功夫喇，唔通上次嘅慘痛經驗令佢唔敢赴會？

究竟周一鑊係怕上台，定怕見到啲做到殘晒嘅醫生，所以前晚唔敢現身呢？聽西醫工會會長楊超發講，周一鑊以往都有嚟晚會，上年仲一共唱咗十首歌添，不過周一鑊就話自己今年要去澳洲探親，所以唔出席嘞。既然人哋都出動到探親做理由咯，咁工會無理由硬要人登台嘅，楊超發又講笑咁話，可能因為政府派咗六千蚊，好多人都趁聖誕節去咗旅行，所以前日好多人都去唔到晚會，就連每年例牌捧場嘅行政會議成員梁智鴻，今年都話要去旅行，仲係有史以嚟第一次嚟唔到添。梁智鴻太太的確同我哋講過，金刀梁要人逼佢，至肯去旅行。

咁如果想證實一下周一鑊嘅歌聲，可以點呢？醫學會喺嚟緊嘅三十一日都會搞個周年晚會，醫學會會長蔡堅話，佢哋一個月前已經請咗周一鑊出席架喇，不過對方就未答實話會唔會到，只係話如果喺香港就會出席。答得咁曖昧，證明事態真係好詭異。如果周一鑊真係新年後先返香港，咁咪呢排都無機會聽佢唱歌囉！如果周一鑊再唔登台，睇怕佢班粉絲好快會淡忘佢嘅歌聲，咁就唔會再有人出嚟捍衞佢架喇。