中環出更：王紹恆蒲藝術館搵靈感
金城營造集團主席王國強同做董事嘅細仔王紹恆（Rex）都係讀建築出身，不過爸爸讀嘅係工程，囝囝就修讀建築設計及美術，閒時都會去歐洲各地嘅藝術館取經。Rex話自己喺美國讀完大學之後，有段時間喺西班牙工作，成為當地藝術館嘅常客，得閒就去參考吓啲建築設計，增加創作靈感。
事業為重 享受單身
依然單身嘅佢，有冇畀家人催佢快啲成家立室？佢話繼後香燈嘅任務已經有哥哥王紹基完成，而且覺得自己仲好後生，應該專注喺事業上面喎。講到公司發展，Rex話前景依然樂觀，皆因金城包辦咗香港十大基建入面唔少工程，包括西九文娛藝術區嘅鋪煤氣、拉電線等前期工程。