中環出更：肥亨嫁女冠蓋雲集
年尾旺嫁娶，尋日Boxing Day，係中策集團主席馬時亨（肥亨）嫁女嘅大日子。肥亨大女馬露明(Christine)同俊朗醫生劉仲恒(Kevin)閃電結婚，喺君悅筵開近五十圍，城中超級富豪、政商界猛人雲集，齊齊冒寒飲喜酒，認真畀面。
三十歲嘅Christine係馬家掌上明珠，阿囡出閣，肥亨大排筵席高興吓。婚禮分上下兩場，下午二時先喺君悅註冊，逾四百位嘉賓到賀，見證甜蜜時刻。
阿松子女做花童
前財爺梁錦松同肥亨係沙煲兄弟，派出千金同公子做花童。一對新人均為虔誠基督徒，會場布置成小教堂，好溫馨。Christine同老公Kevin真情剖白，訴說相識經過，聽到班姊妹眼濕濕，新娘子細妹馬露玲更感動落淚，反而肥亨最淡定。
拍拖一年即結婚
Christine同老公拍拖一年就結婚，新娘子話，兩人其實認識兩年，佢欣賞老公為人細心、體貼，Kevin就讚太太敢於實踐夢想開辦英語學校JEMS，對佢一見鍾情喎。一對新人應記者要求即場「咀嘴」，更錫足十幾秒，保證大家影到相。講到婚後「造人」，兩人就話順其自然，等神的安排。
肥亨初次做外父，佢話high足幾個月，口水肩都換咗八條，熱愛高爾夫球嘅佢不忘趁接新娘環節考考女婿，要佢推桿入洞，幸好Kevin成功過關。Christine同老公揀咗去馬爾代夫度蜜月，羨慕死人。
講番晚宴，可謂衣香鬢影，肥亨喺政商界人脈廣，恒基主席李兆基、新地聯席主席兼董事總經理郭炳江、滙豐銀行亞太區行政總裁王冬勝、保安局局長李少光、旅發局主席田北俊等紛到賀，前高官就有廖秀冬、葉澍堃同蔡瑩璧，賓客多達五百人，肥亨話場地有限，若然掛一漏萬，請大家多多包涵。
卓妮