政情：葉劉今年聖誕過大海

身為廿四孝媽媽嘅葉太，每年聖誕都會喺百忙之中擠出時間，陪囡囡葉榮欣Cynthia度假，兩母女共享天倫，好似舊年聖誕，佢哋兩個就遠走峇里，過一個炎熱嘅聖誕，今年佢哋亦唔例外，兩母女互相陪伴。不過葉太話，今年就好難出埠，事關今年係好年，唔少朋友都趁年尾拉埋天窗，多場婚禮佢都要現身祝賀，真係想去遠行都唔得。

雖然葉太唔可以離港太耐，但為咗把握陪囡囡嘅時間，葉太話今年佢可能同囡囡去澳門玩一轉，反正澳門啲酒店又平又靚，唯一擔心嘅係訂唔到房啫。無遠行，劉太得閒就關注吓世界大事，佢尋日就喺facebook講到《紐約時報》嘅一篇報道，講到美國嘅少數族裔同美國女兵受虐嘅問題。