政情：鬍鬚曾度預算案呻慘博同情
聖誕節係普天同慶嘅日子，但財政司司長鬍鬚曾曾俊華就喺網誌大吐苦水，話自己半點聖誕歡樂都沾唔到，事關佢聖誕節邊度都無得去，日日要喺屋企閉關做預算案。鬍鬚曾叫苦連天，都唔知話佢係唔貼近民情好，定係博同情好。
鬍鬚曾話要度一份預算案一啲都唔容易，有咗初稿之後仲要同唔同嘅政府部門傾，佢仲自爆話，上年嗰份預算案，就係要改到第十稿至出街。好似佢自己話齋，真係嚇咗一跳，改九次之後都仲係製作咗一份史上最廢預算案，可知呢個財爺幾咁廢，後來要亂派錢補鑊，今年嗰份預算案提早成個月，二月一日就面世，唔知會唔會仲廢過史上最廢嗰份呢？
有時付出嘅時間同成果真係未必成正比，如果一個人能力有限，就算你點磨爛蓆都好，就算畀你改一百次都好，份預算案係廢就係廢架啦﹗