政情：新星作反民記管唔掂
本港政黨銳意培植新人，等佢哋可以接班，但畀佢哋發揮同表現之餘，都要睇睇佢哋嘅言行舉止有無出軌。年僅三十二歲嘅青年民建聯主席周浩鼎一直都係黨內重點栽培對象，不過佢不時都會走遠咗，尋日喺《城市論壇》，佢講到就纏擾行為立法，就似乎同黨內大佬嘅講法有出入。
上星期至獲政府委任為離島區議員嘅周浩鼎尋日唔係《城市論壇》嘅嘉賓，佢喺台下發言，話纏擾行為主要係規管癡男怨女，唔應該有行業獲得豁免，包括新聞界，又話法例通過後，記者可以喺庭上用合理行為作為抗辯理由，擔心如果為新聞界開咗先例，其他行業都會跟住要求豁免。
周浩鼎可能講得比較直，講穿咗民記嘅立場，民記立法會議員葉國謙上星期喺立法會政制事務委員會上，只係話新聞界應否豁免，要諮詢公眾，但強調要維護新聞自由。
本身係律師嘅周浩鼎不嬲直腸直肚，例如幾個月前，佢喺《城市論壇》上直斥政府應該考慮係唔係仲要喺民意一面反對嘅時候硬推替補機制，搞到葉國謙要急急腳出嚟澄清民建聯不支持押後立例。事隔幾個月，又係周浩鼎、又係《城市論壇》、又係同葉國謙！
話時話，做得青年民建聯主席，民記力捧周浩鼎不在話下，本來嘅計劃，係支持佢喺荃灣出選區議員，但後來建制派經過一輪協調之後，將個選區讓咗畀新民黨嘅田北辰，於是佢個名自然就喺建制派嘅委任區議員推薦名單上，所以佢雖然係委任，遲早都會出去選，前途無可限量，不過係咪要學吓緊跟黨嘅路線呢？唔係個黨點捧佢上位？
李偉儀打女性牌
其實纏擾法唔單止搞到民記團團轉，人民力量執委李偉儀以性別及女性研究學者身份出席，佢呢頭話政府需要立例保障婦女，仲話天水圍有啲個案係因為警察唔理先會釀成悲劇，但佢轉個頭又話纏擾行為內容既不足以保障受虐婦女，又會打壓示威和新聞採訪，總之就會造成社會分化，人心惶惶。所以話，從政嘅人要喺敏感問題上揀一個立場，都唔係話咁易架。