中環出更：吳永嘉老友帶路食盡首爾
廠商會副會長吳永嘉（Jimmy）天生有食神，不時穿梭各國「搵食」。趁聖誕假，佢同好友合組「首爾瘋狂美食團」，大擦正宗泡菜生蠔、烤牛大腸及燴牛肉，全程食唔停。
多得韓國朋友做嚮導，Jimmy同太太此行行到邊，食到邊。Jimmy得老友帶路，冒嚴寒到訪多間地道小店。
首爾凍到零下八度，但時令菜式依然有，就係生蠔嘞。產自濟州島嘅生蠔，小巧肥美，入口無外國生蠔咁膩。Jimmy話，傳統嘅食法好講究，先拎起一片泡菜，包住生蠔及醃豬腩，再加入蝦膏汁，入口啖啖甘香。
Jimmy喺韓國喪食，朋友再帶佢食泡菜醃生蟹、BBQ烤大腸及韓式燒濟州島玉魚，每味餸喺香港都係難得一吃。機會難逢，努力減肥嘅Jimmy都放下禁忌，盡情喺韓國擦餐勁。
臨走超市最後衝刺
臨走前，Jimmy嫌未夠喉，喺機場附近嘅樂天超市最後衝刺，狂掃新鮮泡菜生蠔、韓國牛扒同甜紅蘿蔔等，打包上機。韓國牛扒唔平，每塊要數百港元，但肉質媲美日本和牛，買嚟賀聖誕，正合時宜。咁食法，Jimmy話僅僅肥咗兩磅，有潛質再食多啲。