除咗監警會，政府尋日又公布二○一二年度嘅授勳評審委員會委任名單，成員同上年一模一樣，全部都係煲呔曾親信，例如佢「親兄弟」財政司司長曾俊華、行會成員劉遵義、張建東咁，繼續親疏有別，任人唯親。
呢個委員會專責向特首推薦該年度嘅授勳人選，上至大紫荊、金紫荊，下至太平紳士同社會服務獎嘅人選都要經過佢哋手，一般喺六月份做決定，但公布同頒獎就喺七月同十月。即係煲呔曾仲可以趕及喺六月三十日卸任前，透過呢批自己友分餅仔畀其他自己友，並透過下屆特首雙手頒勳章畀佢哋。如果授勳名單最後爆出爭議，同樣係下屆特首啃晒，煲呔曾完全唔使孭鑊！