政情：張建宗忽變細路湯圓
勞工及福利局局長張建宗日前探訪保良局總部，了解保良局嘅兒童住宿照顧服務，仲同一班小朋友提早慶祝聖誕節，一齊玩遊戲、派禮物，非常之溫馨。
當日小朋友對張建宗表現得好熱情，由頭摸到落腳，不過並唔係因為張建宗本人受歡迎，而係畀佢扣喺件西裝褸上嘅飛龍襟章吸引住啫。個個小朋友見到佢，都忍唔住要摸吓個襟章。
張建宗見到班小朋友咁鍾意個襟章，當場拍心口應承佢哋，之後補送番畀每一位小朋友。
守承諾嘅佢一返到寫字樓，即刻自掏荷包叫同事買襟章，不過佢考慮到個襟章好睇未必好玩，就靈機一動，送襟章之餘仲加送一張精美嘅飛龍印水紙，相信一定會氹到班小朋友好開心啫。