政情：工聯會情侶 唔敢去睇樓
區議會選舉完咗冇幾耐，政壇已經喜事一浪接一浪。喺選舉中成功擊敗工黨主席李卓人嘅「工聯小花」劉桂容（阿容），今個月初已經接受咗男朋友葛兆源（源仔）求婚，預計喺一三年拉埋天窗。本身係荃灣區議員嘅源仔笑言，雖然今次求婚成功，但仲有置業呢關要過。
樓價高企令年輕人望樓興嘆，源仔同阿容呢對八十後區議員都有呢個問題，異口同聲話暫時都唔敢去睇樓，打算趁仲有時間，兩個一齊積極儲錢，阿容又話，自己來年首次做議員，好多嘢都未上手，所以暫時都唔會花時間籌備結婚，首要做好地區工作。
源仔今年年中成為工聯會荃灣唯一區議員，可以接手用上手議員嘅辦事處，不過都搞咗佢幾個月喇；至於阿容仲慘，由於選區重新劃界，佢依家仲未搵啱地點設辦事處，幸好工聯會另一區議員姚國威肯同佢共用辦事處，否則都唔知點服務街坊咁話。