政情：龜縮陳維安 走側門快閃
教育局副局長陳維安為首嘅學與教資源檢討小組，負責嘅教科書招標自從「爛尾」後，局長孫明揚獨力撐咗成個星期，尋日終於頂唔順，原本應承出席香港大學百周年校慶活動「全球校長峰會」，亦因病缺席，改由陳維安頂上。「失蹤」咗六日嘅陳維安再現足迹，但龜縮嘅佢繼續封口，更繞過正門避開記者，成為快閃黨。
尋日陳維安出席港大百周年嘅慶祝活動——全球校長峰會之「東西對話：競爭或協作」，同七十位來自世界各地的校長，分享高等教育國際化嘅心得，而原定出席的孫公就未見人。聽孫公新聞秘書講，孫公缺席係因為抱病在身，未能出席，日前已通知港大換人，仲話孫公睇完醫生已經無大礙。
陳維安失蹤多日後現身，成為傳媒焦點，當佢等緊拍大合照時，記者主動問佢為何連日未見人，佢只係笑笑口話搵日坐低先傾，仲急急腳走向人群，迴避記者。佢致詞完畢後，竟然從側門離去，繼續龜縮快閃，全程只逗留一粒鐘。醜婦終須要見家翁，唔知佢要避到幾時呢？