政情：阿Paul打通經脈九東直選

好似尋日咁，油塘鯉魚門一個小小嘅公開活動，已經有兩位九龍東立法會議員陳鑑林同黃國健現身撐場，但最估唔到係法律超人謝偉俊（Paul）都有去。據聞阿Paul已經打通中聯辦喺地區嘅經脈，照辦煮碗，用「鼠王芬」梁美芬模式，以專業人士身份，喺九龍東直選。　

本來喺立法會旅遊界代表嘅阿Paul對直選蠢蠢欲動早有所聞，各區佢都評估過，近日應該決定咗去九龍東。尋日佢出席鯉魚門海濱學校活化成創意中心嘅開幕典禮，動機已經好明顯，佢同黃國健（K K）、陳鑑林（橄欖）同場，三人雖然有碰頭，但都係冇乜兩句，反而各自同其他地區人士打招呼，如果唔講，仲以為佢哋已經為明年立法會選舉拉緊票。

其實K K同橄欖唔理阿Paul，未必無因，因據聞後者已搵到強勁勢力撐腰，決定踩落九龍東，近期仲招兵買馬，請多幾個議員助理，連辦事處地點都搵埋。聞說有關勢力已決定再次啟動「鼠王芬模式」，好似上屆立法會咁過票畀梁美芬咁，將地區鐵票暗中過畀阿Paul，總之K K同橄欖夠贏就得嘞。

K K橄欖笑唔出

咁搞法歡喜嘅當然係阿Paul，但愁嘅就係民建聯同工聯會，有關方面指揮棒一揮，就要眼白白睇住自己辛辛苦苦掘返嚟嘅票，「啅」一聲轉贈他人，其實做建制派嘅，真係有苦自己知。唔怪得K K同橄欖，尋日寧願同班街坊握手吹水，都唔理阿Paul。都啱嘅，邊有人同搶自己嘢嘅人做朋友o架。

三年幾前，仲未成為立法會議員嘅「鼠王芬」平地一聲雷，砌低當時係自由黨嘅田北辰、踩低公民黨殺入議會，好多人都知道佢背後有勢力撐腰，自由黨當時一直要同嗰一股強勁勢力講數，講到最後一刻，地區嘅一大舊鐵票，終於都係得唔到手。

估唔到歷史將會喺明年立法會選舉重演，唔知法律超人落到九龍東，又可以產生乜嘢化學作用呢？