中環出更：港大百年校慶晚宴 賭王壓軸登場
百年老店嘅香港大學，尋晚喺會展開世紀Party，慶祝一百歲生日。逾五千校友、海外校長及城中富豪齊到賀，筵開三百五十幾圍，擺滿新舊兩翼，盛況空前。賭王何鴻燊都以港大校友身份冒寒出席，燊哥最叻搞氣氛，直到壓軸切餅儀式一刻才突然出現，引來哄堂掌聲。
港大人才濟濟，新知舊友聚首一堂，多位前港大校長包括黃麗松、王賡武、前港大副校監楊鐵樑，以及多位高齡校友齊亮相。九十歲嘅燊哥坐住輪椅，由女兒何超鳳等陪同抵達，見番咁多老友，燊哥表現雀躍。
金刀梁太太 那些年無人追
多位知名校友都爭住賀母校，前金管局總裁任志剛、前財爺梁錦松、恒生女大班梁高美懿、恒隆董事總經理陳南祿、前民政事務局常秘李麗娟、骨科名醫高永文、中總副會長方文雄、港大專業進修學院董事局主席張永霖，以及港大校董會主席梁智鴻夫婦等都到齊，星光熠熠。城中富豪龔仁心夫婦、霍震寰及胡應湘夫婦都賞面撐場，真係數都數唔晒咁多人。
港大百年回憶多，真係講十日十夜都講唔完，大會整咗一條長達二百米嘅「大學道」，擺放多幅昔日大學生活巨型舊照，等學生重溫當年荷花池及陸佑堂等發生嘅舊事。原來荷花池係唔少著名校友嘅拍拖勝地，梁高美懿難忘老公當年經常喺港大校門等佢放學，媽打李麗娟就同前夫經常漫步荷花池。當年就讀港大醫學院嘅梁智鴻太太馮令儀就話，難忘那些年無人追，即使大學有聖誕派對都無人約，一度令馮爸爸擔心囡囡太叻嫁唔出喎。
卓妮