政情：新立會嘥錢 改大「狗窿」

如果市民由正門進入立法會新大樓，不難發現進入玻璃門後，就會見到灰蒙蒙一大幅牆，呢幅牆足足有成兩層樓咁高，而喺牆下中間位置，有一個四四方方嘅入口。老實講，身在其中確實有幾分似隧道入口，衰啲講句形容呢個係狗窿亦不為過，以中國人嘅傳統，捐狗窿無疑係自貶身價，如今立法會整個狗窿畀市民出入新大樓，係咪想貶低廣大市民先？

設計原意 議員唔Buy

其實根據設計新大樓嘅建築師嚴迅奇原先嘅想法，呢個入口正正係想畀人一種豁然開朗嘅感覺，所以先至會做到外面睇落去就好細，入到去先發現好大嘅感覺。不過，設計呢家嘢，真係好主觀，事關行到入去真係好有壓迫感，就連部分議員都睇唔過眼，彈呢個設計一文不值，要拆之而後快。

面對連串批評，立法會行政管理委員會尋日終於有個決定，要求嚴迅奇搞搞呢個入口，至於點搞法？行管會將個波交番畀嚴迅奇，要求重新提交一份設計畀立法會考慮，當中要使幾多錢就仲係未知數。不過，搞親改建，唔使上百萬都要以十萬計啦，值唔值真係見仁見智，但最終會改成點大家可以剝定花生等睇戲。

除咗要改大個狗窿外，立法會大樓內嘅空調同照明節能系統太高科技，喺控制方面搞到議員及議員助理頭都大埋，所以建築署稍後會到立法會舉行兩場簡介會，教大家使用新大樓嘅屋宇裝備。話時話，新大樓嘅執漏搞到明年立法會改選都未必搞得掂，話唔定改選後嘅新一批議員又有嘢睇唔順眼，咁執漏工程真係無日無之。