如果你傷風感冒走去睇醫生，醫生居然同你講，嗱，要驗血o架，你會點諗？又如果醫生驗血之前冇同你講清楚價錢，事後先至開出一張天價帳單，你會點諗？功夫茶相信你大概會諗，嘩！你估病人係醫生唔使輸入密碼嘅人肉提款機咩！
大家千祈唔好以為功夫茶憑空想像，有一對姓程嘅年輕夫婦，今年十月因為兩歲兒子三更半夜發高燒，情急之下送咗去鄰近嘅聖德肋撒醫院二十四小時門診。雖然程氏伉儷明知私家醫院收費比較貴，但係完全冇諗過貴得咁誇張。
收費誇張成點呢？院方冇解釋原因就同小寶寶驗血，事前又冇講清楚價錢若干，出院埋單計數，盛惠一萬零八百元，當中驗血費接近六千銀。以咁嘅天價，如果改去普通診所，大概可以睇醫生睇足幾十次。
喂，人哋小朋友傷風感冒咋，名副其實係小兒科病情，照道理完全冇必要左驗右驗，甚至連腎同肝都驗埋。偏偏呢一間私家醫院就係咁誇張，你可以話佢哋服務病人無微不至，亦都可以話佢哋諸多藉口濫收費用。
程氏夫婦條氣唔順自然據理力爭，投訴院方事前冇交代清楚，點知護士長居然咁回應：「可能啲護士做到麻木咗！」
計功夫茶話齋，麻木嘅唔止護士，負責監管嘅食衞局同衞生署先至係麻木不仁之最。點解私家醫院收費可以咁兇狠？因為食衞局麻木，因為衞生署不仁，幾十年來都冇修改條例企圖強政勵治。原來政府係依據《私家醫院、護養院及留產院註冊條例》辦事，而條例舊到冇朋友，屬於上世紀六十年代嘅陳年古董。喺咁嘅過時條例之下，私家醫院即使犯下滔天大罪，罰款極其量都係一千大元，垃圾蟲罰款都高過佢。院方財政更加係不受管制，想加價就加價，想幾貴就幾貴，完全冇人奈得佢何。你去消委會投訴咩？你去衞生署投訴咩？你去醫委會投訴咩？對唔住，統統不受理。
唔好唔記得喎，好多私家醫院都係以慈善團體名義註冊，無論賺幾多錢都係免稅。換言之，私家醫院攞盡便宜之餘，又處於山高皇帝遠嘅無王管狀態，幾鬼死過癮呀！
當然啦，院方過癮即係病人冇癮，肉隨砧板上當羊牯咁劏都冇得反抗。冇錯，食衞局局長周一嶽講過，希望配合醫院認證計劃，日後修例加強監管，包括醫療事故嘅處理方法。之不過咁，預計修例需時三至四年完成，到時係乜嘢世界真係冇人知，事關有人話二○一二年就係世界末日o架喇。
總而言之，麻木不仁嘅官府修例監管之前，祝大家無病無痛身體健康！