政情：美領事踢爆煲呔曾亂噏
煲呔曾上月去咗夏威夷開亞太經合組織高峰會，同美國國務卿希拉妮會面時，除咗畀個疑似露體狂疾走嚇一嚇之外，佢仲大鑼大鼓咁話為持特區護照嘅港人爭取去美國時可以唔使簽證，煲呔曾當時仲話希拉妮回應正面，不過尋日美國駐港總領事楊甦棣就話，佢地暫時無諗住再畀免簽證待遇喎！
依家暫時有三十六個國家嘅護照持有人去美國嘅時候可以享有免簽證待遇，新加坡、南韓都係免簽證計劃成員，可能煲呔曾見自己任期得番七個月，而任期內仲係無咩政績可言，咁啱台灣又同美國傾緊，所以就無執輸咁諗住玩鋪勁，幫香港整個免簽證然後光榮退休。可惜事與願違，其實嗰次見面，希拉妮根本無提供時間表，但煲呔曾仍然沾沾自喜咁話，希拉妮「反應正面」，可能佢唔知啦，其實台灣同美國已經傾到「積極樂觀」嘅地步，所以煲呔曾你依個「反應正面」，其P:實只係十畫都未有一撇。
美國駐港總領事楊甦棣尋日話，佢都好想香港人去美國可以方便啲，但目前嘅免簽證申請都仲未消化得晒，所以暫時應該唔會接受新嘅地區做免簽證計劃候選人。究竟煲呔曾係博懵定係無知，就得佢自己至知嘞。
楊甦棣尋日又話，領事嘅其中一項工作，就係要同社會唔同界別嘅人溝通，了解香港民情，其實講咁耐都係想澄清近日對佢嘅一啲負面報道。佢自己唔係淨係見泛民人士，亦無捐錢畀任何泛民政黨，就算建制派，例如立法會主席曾鈺成、自由黨榮譽主席田北俊等佢都有見，而依個做法亦都係符合國際外交慣例。
特首人選須民意認受
近排區選、選委種票滿城風雨，但楊甦棣就話有信心依屆係香港最後一屆小圈子選舉，不過一啲普選執行問題始終至睇下屆特首點做，咁邊個先係特首嘅理想人選呢？楊甦棣就話佢好認同港澳辦主任王光亞所講，特首人選唔單止要愛國，民意認受亦都好重要嘅。