三十六名建制派立法會議員喺去年政改期間，開始每個月搞一次飯局，希望可以加強溝通合作，聯手狙擊泛民主派。但由於每月先見一次面，加上各黨派唔團結，成日飯局都唔齊人，例如上周四嗰次飯局，就只得約一半議員出席，部分人又經常遲到早退，令飯局嘅成效只屬一般，唔似泛民每周五飯盒會咁機動同成日有聯合行動。
為咗解決上述問題，建制派決定變陣，學泛民咁改為每個禮拜聚一次，並且暫定喺「三條三」、即每個星期三嘅下午三點鐘，喺立法會三樓一個會議室舉行。除咗貪佢易記之外，最重要係當日卅六名議員本身都要齊集立法會開大會，大家只需喺會議中途開小差，再坐電梯上樓就碰到面，夠晒方便。另一個改革亦係抄足泛民，就係正式改行代表制，即各建制黨派每次只需派一名代表開會，今日就會首次實行。
變陣後成效如何，要睇各黨派有冇心。改革後由於唔再係食飯，無理由仲叫建制派飯局，至於將來叫乜名，就有待大家畀意見喇！