政情：A16聯盟「貓紙」教投票
特首選委會選舉嚟緊周日投票，各選委候選人都奇招百出去拉票。參選會計界嘅A16聯盟繼早前集體印製獨有卡片後，近日又出新招，就係向選民派發印有聯盟成員姓名同競選編號嘅卡片，簡單啲講即係教選民投票嘅「貓紙」。聯盟召集人葉冠榮話，印呢批卡片都係想方便選民，費事佢哋投錯票喎。
A16聯盟印咗呢批新卡片，雖然都幾好諗頭，但就搞到葉冠榮有啲驚青，擔心卡片淨係得姓名同編號，都唔知算唔算選舉廣告，又話會提醒選民投票當日唔好喺票站展示咁話。其實會計界有幾十人參選，選民真係唔知邊個打邊個，所以帶張卡片入票站當提醒自己應該冇問題嘅，只要唔好向其他人展示就得嘞。
至於參選資訊科技界選委嘅網民力量都有唔少花招，除咗拍短片宣傳外，參選人之一嘅Sony Computer Entertainment香港分公司董事項明生話會喺今日邀請特首參選人唐英年與網民對話，同帶埋靚女模特兒去派傳單宣傳添。