政情：張國柱離民協入工黨
由泛民主派籌組嘅工黨今個月十八日正式成立，社福界立法會議員張國柱將會出任工黨紀律委員會主席，但為免雙重身份，佢會退出民協，令民協又少咗個創會會員。不過，工黨拉唔到街工埋堆，而候任主席李卓人早前又輸咗區議會選舉，隊形同陣勢已經輸咗一大截，所以阿柱貿然轉黨，可以講係孤注一擲，前途未卜。
按目前安排，李卓人坐定粒六做工黨主席，前公民黨成員張超雄及公民起動何秀蘭就會做副主席，而阿柱只係做紀律委員會主席，唔會做執委，話要留番啲機會畀後生仔喎。阿柱係民協嘅司庫，問到佢同民協嘅關係，佢就似乎去意已決，連信都遞咗咁話，睇嚟佢真係一心一意朝向工黨發展。
民協秘書長譚國僑話，阿柱一早提過可能會因為搞工黨而離巢，以民協嘅角度，佢哋當然唔想有人離隊啦，但都要尊重阿柱嘅諗法，又話工黨始終都係泛民友好，阿柱亦唔係同民協路線唔同而離開，所以相信佢哋嘅關係唔會有乜嘢唔同喎。