政情：李澤鉅李澤楷返母校主禮
位於麥當勞道聖保羅男女中學新翼嘅「莊邱碧雲太夫人舍堂暨李莊月明樓」，尋日正式開幕，該大樓面積約九萬二千呎，耗資逾二億元興建，當中一億六千萬元由李嘉誠基金會捐贈。作為李嘉誠基金會董事兼聖保羅校友嘅長實集團副主席李澤鉅（Victor）及電訊盈科主席李澤楷兩兄弟，尋日返母校為新大樓主持開幕禮。
捐一億六千萬建大樓
李氏兄弟重臨校園，好熱情同學弟學妹們握手，又同校董會主席譚尚渭、校長陳黃麗娟言談甚歡，兩兄弟邊行邊咬耳仔，似細訴當年趣事。譚尚渭話，一億六千萬元捐獻對全港中小學來說，相信係史無前例，並對李嘉誠基金會及李氏家族嘅慷慨解囊及巨額捐款致以萬分感謝。
Victor就話，基金會成立超過三十年，爸爸李嘉誠已表明會注入其資產嘅三分一，過去五年及預計未來五年大概每年捐款以十億元計，約九成用喺香港同內地項目，包括教育、醫療同慈善等項目，至今已經捐逾一百二十五億港元。
講到特首選舉，作為選委嘅Victor對此不欲多談，只係話要揀一個港人可以信任嘅人選。講到樓市，Victor幽默地用提子包作比喻，佢話大家覺得樓市升，其實提子包都貴咗三成幾，係因為銀紙貶值，因而令到樓價貴，所以大家唔應該只着重睇樓市，應該睇全盤經濟喎。