中環出更：夏佳理盼愛駒挫宿敵雪恥
港交所主席夏佳理（Ron）係賽馬發燒友，除咗香港，喺澳洲英國新西蘭都有養馬，而好多國際知名嘅賽事，Ron都唔會缺席。不過，佢喺上月墨爾本盃嘅比賽中，其愛駒僅以極微嘅差距屈居亞軍，與獎盃擦身而過。君子復仇毋須等十年，能否雪恨嚟緊星期日就知。
墨爾本盃輸條馬鬚
Ron嘅愛駒「紅色禮物」係英國馬，與法國馬匹「多利得」喺墨爾本初次較量，兩隻良駒於賽道上叮噹馬頭齊過終點，結果「紅色禮物」以一條馬鬚嘅距離而飲恨，創咗墨爾本盃有史以來最短嘅勝負差距。「紅色禮物」好快就轉戰香江，參與嚟緊星期日嘅國泰航空香港國際賽，「多利得」亦會爭埋一份，到時沙田馬場必有一番龍爭虎鬥。
對於呢場賽事，Ron當然好期待，不過「紅色禮物」能否一雪前恥，當中存有唔少變數。例如馬匹能否適應環境，因為馬同人一樣，經過長途飛行之後都會暈機浪，而擅長跑長途嘅「紅色禮物」喺墨爾本嘅三千二百米賽程中表現優秀，但是次嘅賽程只得二千四百米，能否發揮所長尚有疑慮，加上「紅色禮物」唔係咁適合跑硬地，所以如果呢幾日落番幾滴雨，趁地面軟淋淋嚟跑，就有較高勝算。所以話，贏唔贏，真係要睇天。