中環出更：霍震寰珍藏CY陳年照
如果有人時刻都帶住自己同已宣布參選特首嘅前行政會議召集人梁振英（CY）嘅陳年合照喺身，呢個人仲唔係挺梁？帶住張舊照「傍身」嘅係霍英東集團行政總裁、港區全國人大代表霍震寰。佢就話自己識咗CY廿幾年，但係唔係撐CY？佢冇講。
卓妮前日喺海南商會一個活動上見到霍震寰，傾開佢識咗兩位都已經宣布參選特首嘅CY同唐英年有幾耐，霍震寰話識咗CY已經有廿幾年，唐唐就係喺佢做咗官之後先至有較多機會接觸。卓妮見佢手上玩緊一部三星平板電腦Galaxy Tab，於是問佢部電腦平時有乜特別用途，點知佢立刻就話要搵張相畀卓妮睇，之唔係佢同CY嘅合照囉。佢仲將張相電郵咗畀卓妮，等我哋可以慢慢睇喎。
80年代訪京團 象哥同行
張相有成卅人，一睇就知係八十年代一張訪京團嘅照片，企喺前排中央嘅，係已故前國務院港澳辦主任姬鵬飛，相中嘅霍震寰同CY都好年輕，分別喺前排同第三排，當中依稀認得嘅另一位「年輕人」，竟然係上月底挺身出席CY造勢大會嘅民建聯立法會議員象哥黃定光。原來象哥都識咗CY最少廿幾年。
卓妮問番象哥，佢記得當時係一九八五年，訪問團由中華總商會青年委員會及中華出入口商會青年組合辦。不過，佢對於卓妮有呢張合照覺得好驚訝，因為呢類訪京大合照，通常唔會流「出街」嘅，唔明點解卓妮會攞到。
相片上面熟口熟面嘅，仲有全國人大代表王敏剛、前立法會議員胡經昌及已故立法會議員許長青。相中仲有兩位美人，其一係企喺較側位置嘅霍震寰太太陳琪琪，企喺前排嗰位，原來係國務委員劉延東。象哥話劉延東當時係全國青聯主席，青年團訪京，一定會同青聯領導見面。
霍震寰係全國人大，屬當然選委，呢位已故全國政協副主席霍英東之子支持邊個，佢話要賣個關子。
卓妮