提起宗教糾紛，一定會諗到戰火不斷嘅中東。原來香港國際機場「全球最佳」徒有虛名，因為設計失當，亦隨時可能引起文明衝突，真係丟架咯。
你知啦，祈禱係宗教人士必做「功課」，即使人在旅途亦唔少得。全球有唔少機場都會設立祈禱室，供有宗教信仰人士使用。作為國際都會城市，本港亦唔例外。現時香港國際機場有三個祈禱室，話少唔算少，但係旅客就怨聲載道。
何解？原來呢三個分別位於客運大樓登記大堂同禁區內嘅祈禱室，全部唔分宗教，畀有不同信仰人士共用，室內亦冇任何宗教標記。即係話，同一個空間，唔同信仰人士各有各拜，你拜上帝，我拜阿彌陀佛，佢拜真主，夠晒熱鬧。
開講有話，各處鄉村各處例，歷史悠久嘅宗教更加唔使講，唔同宗教對祈禱有唔同清規戒律，必須嚴格執行。好似伊斯蘭教咁，教徒每次祈禱都要面向麥加參拜，最忌前面有人行過，因為佢哋拜嘅係真主，唔係路人甲乙丙。有信奉伊斯蘭教嘅旅客話，共用祈禱室「No good」。亦有學者批評祈禱室設計同安排唔尊重個別宗教，係國際笑話。
仲有更離譜，其中一間祈禱室竟設喺女廁隔籬。有出家人直言洗手間始終係不潔地方，喺旁邊設立祈禱室不恰當。亦有基督徒指，按中國傳統，洗手間係唔吉利地方，機場方面「要做就做好啲」。
唉，盛名之下，其實難副。香港國際機場每年客運量超過五千萬人次，仲屢獲殊榮添。呢，截至上月底已經獲得九個最佳機場獎項，弊在可以「做好啲」嘅，偏偏做到甩甩漏漏，劣評不絕。祈禱室選址設計就係典型，同鄰近地區其他機場比較，高下立見。
呢，就講台灣桃園機場吖，考慮到每個宗教規矩唔同，祈禱室被規劃為伊斯蘭教室、基督及天主教室同佛教室。泰國曼谷同清邁機場、日本關西機場以至遠在英國嘅倫敦希思路機場等，唔係有獨立伊斯蘭教祈禱室，就係喺祈禱室分設伊斯蘭教角落，唯獨香港機場嘅祈禱室變咗「宗教聯合國」。
有立法會議員話，本港機場祈禱室淪為國際笑柄，唔係資源同地方不足，而係管理粗疏，抱住「聊勝於無」心態辦事。話時話吖，香港國際機場起到美輪美奐，硬件一流，但管理水平不敢恭維。呢，早排就發生過外籍青年輕易闖入機場禁區內路軌，造成捷運系統癱瘓四小時嘅事件。
咪話功夫茶唔提醒吖，如果港府同機管局唔重視問題，改善管理，第日嗰條一千三百幾億起嘅「全球最貴跑道」就算落成，遲早亦變成「聊勝於無」嘅空擺設咋！