政情：蔡志明受落「玩具大王」稱號
「玩具大王」旭日國際主席蔡志明一向鍾情房地產，多年來未停過大手買入貴重物業，地產身家水漲船高。最近有商界口痕友話，蔡志明再唔係玩具大王，應改叫「地產大王」就真。日前喺活動上遇到蔡志明，佢大方承認名下地產財富已經多過玩具生意，但聽到有人要摘下佢享譽多年嘅「玩具大王」稱號，就唔係咁受落喇！
蔡志明話，自己依然喺玩具業稱霸，包括近年投資十五億元喺韶關擴建廠房，而且每年生產嘅玩具產量高達四十億件，無論以規模、產量計算仍然稱霸全球，仲話要安排我哋去參觀吓佢啲工廠添！言談之間，顯露出佢對發迹嘅玩具業十分重視。
蔡志明近年不時豪買地產物業，包括尖沙咀安達中心及KCP九龍城廣場，市場人士估計現時市值高達卅億元以上。難怪負責打理集團地產業務嘅細女蔡加怡話，爸爸眼光真係好犀利。