政情:建制派乘虛而入測試泛民

泛民主派喺今屆區議會選舉大敗,有意見認為係反映市民覺得由社民連同人民力量開創嘅粗口、掟嘢同示威暴力文化嘅風氣不可長,事後公民黨、民主黨同民協等「溫和」民主派,紛紛聲言要同社民連及人民力量割席。喺大前晚舉行建制派立法會議員每月例行飯局,有人就建議乘勝追擊,重提修改立法會《議事規則》,杜絕粗暴議會文化,順便測試吓班溫和泛民係咪真係已經同暴力政治劃清界線,定係喺大敗之後虛應選民,繼續護短。

今屆立法會仲有大半年先結束,議事堂內掟蕉、掟蛋、掟樽、掃枱、爆粗、放氣球等等,各式各樣嘅衝擊行為都出齊咁滯,建制派議員老早就諗計將「掟嘢三人組」、即人民力量議員黃毓民、陳偉業,同社民連議員梁國雄趕入絕路。方法之一,就係進一步收緊《議事規則》,授權主席除可以出紅牌趕議員出場之外,仲可以罰重犯嘅議員停賽,暫時唔准佢哋開會。

之不過,立法會想改《議事規則》唔係咁簡單嘅,首先要喺立法會議事規則委員會傾咗先,之後拎上立法會大會投票表決,仲要經過分組點票。以往議事規則委員會已多次討論,點樣可以針對性處分啲一而再、再而三行為不檢嘅議員,但最後都達唔成共識,更遑論提上大會投票?即使委員會夾硬拎上大會表決,喺分組點票下,只要一定數目嘅泛民議員反對甚至棄權,修例建議都無法通過,真係談何容易。

兩邊不是人難拆彈

時移勢易,經過舊年嘅「五區公投」、政改投票、以及今屆區選嘅狙擊行動同慘敗結果,泛民溫和派同激進派幾乎已經全面分裂,公民黨、民主黨同民協先後話要同「掟嘢三人組」割席,即使公民黨同民主黨之間,亦因為特首選舉同外傭居權官司等搞到口和心不和。建制派今次重提舊事,再次策動修改《議事規則》呢個「不可能的任務」,就係睇中泛民分裂呢個缺口,打算乘勝追擊、乘虛而入。

大家不妨細心諗吓,一旦建制派拋出一啲勁辣嘅修例建議,之前開晒口話要和平理性非暴力冇粗口嘅公民黨同民主黨,如果唔肯支持,建制派就可以大條道理質疑兩黨只係假割席虛應選民,繼續為已被選民厭棄嘅政治暴力護短,到時兩黨點向公眾交代呢?

相反,如果兩黨最後支持修例,人民力量同社民連一定會以加倍力度,喺議會內同明年嘅立法會選舉中瞓身狙擊兩黨,真係左右做人難,大家即管放長雙眼睇吓佢哋點拆彈!

「Money18免費即秒股票報價網站」現推出8升級功能,財經資訊,實時實發!