中環出更：丁志威當選抱負 禁絕「蛇齋餅糉」
今屆區議會選舉結果令人意外，有唔少首次參選嘅新鮮面孔跑出，其中黃大仙竹園北選區嘅八十後丁志威（Roy），就成功以大比數擊敗社民連陶君行，令政界對呢位新丁刮目相看。阿Roy坦言對結果感到意外，期望喺未來四年一一落實各項大計，特別係要禁絕「蛇齋餅糉」，以堅實嘅地區工作及兌現街坊承諾取勝。
阿Roy稱得上係富二代，要幫手打理龐大嘅家族塑膠、珠寶及製衣等生意外，而且公職多多，包括擔任珠海市政協委員、中華廠商聯合會青年委員會委員、促進教育基金會理事等，年前更成立咗服務社區嘅「陽光勵進會」，並於竹園北選區工作，如今成功走入政壇，佢話已經有晒心理準備，會妥善分配時間。
搞有意義活動報答街坊
對於有傳聞話阿Roy當選係全賴商會、社團喺背後撐腰，佢就連番否認話：「當時已經有八十幾個街坊自願組團幫我拉票，我直頭叫商會啲人唔好過嚟添呀，我唔想利用政治影響力。」提到與強勁對手陶君行之爭，阿Roy話，其實唔係大家諗得咁激，大家拉票都好守規矩、好和平，係一場君子之爭。」總之成個選舉完全冇火藥味。
至於未來四年工作，阿Roy話首要工作係要爭取區議會撥款，喺竹園道一條又窄又長嘅舊樓梯旁邊加建升降機，方便區內長者及嬰兒車上落。佢又話，雖然好感激街坊支持，但絕對唔會出動「蛇齋餅糉」報答街坊，改為搞啲有意義嘅活動，例如有志願團體捐出展覽會入場券，佢會叫街坊做義工換取。
卓妮