醞釀多時嘅新工黨終於有眉目，佢哋鐵定喺今個月十八日正式成立，到時會選舉主席、通過黨章等，主席人選方面，截至尋日為止只得職工盟立法會議員李卓人報名，睇嚟都係阿人做居多喇。話時話，阿人喺今屆區議會選舉中飲恨，以百幾票輸咗畀工聯會小花劉桂容，依家做番黨主席，都算係攞番個安慰獎。
尋日阿人話，成立典禮會遲啲先搞，事關十八日嗰日要處理唔少程序，到時主席之位會以一人一票方式選出，三位副主席、司庫及秘書長，則由廿一名執委互選。雖然暫時得阿人報名選主席，但都要投信任票決定，不過阿人應該坐定粒六架喇！
據講新工黨會有團體會員，包括物業管理工會、新巴工會、九巴工會及公民起動，新巴公會仲好慷慨，以友情價租出部分地方畀新工黨落腳。阿人講講吓，工聯會議員黃國健咁啱路過，立即恭喜準主席阿人，阿人即時笑到見牙唔見眼。