Hea住等收工嘅煲呔曾，前晚出席中大新聞獎頒獎禮時亂咁噏，除咗暗批部分新聞猶如文學創作外，又話自己每日食早餐時都會睇六份報紙，但睇到心跳加速，之後要去教堂先可以平復心情，佢嘅踩場行為已隨即被各界狠批。
點知佢仲要唔知衰，尋日將有關言論圖文並茂上載社交網站facebook嘅政府群組，即時畀班網民鬧爆，自取其辱。
有網民一見煲呔曾嘅留言，即回覆話：「收la！」又有網民批評：「一日睇六份報紙都掌握不到社會脈搏...服了！」亦有人恥笑煲呔曾：「虛偽無極限」、有人揶揄話：「曾蔭權討厭記者，人所共知，他自己也說卸任後不想再看見記者。由他來頒獎給記者，真是諷刺到極點。」
睇到呢啲回應，可見香港人幾咁想佢早走早着，唔好再禍港殃民。