中環出更：家己冷開P食得夠「潮」
中環遮打花園尋日非常熱鬧，事關潮州商會舉行潮汕文化嘉年華，活動係商會九十周年嘅重頭戲，以飲食為題向市民推介潮州文化。為咗令大家品嘗最正宗嘅潮菜，商會會董專程身赴潮汕，尋找最出色嘅食肆並帶來香港，務求省靚潮州菜嘅招牌。潮州商會會長陳幼南就至愛「老鵝」，即係飼養超過兩年嘅獅頭鵝鹵制而成，喺本地潮菜館好少有得食。
永遠名譽會長莊學山都有到場湊熱鬧，佢話香港嘅潮州菜有本地化危機，因為部分本地潮菜館多數提供蒸魚菜式，但其實浸魚先至係傳統嘅潮州烹調方法。至於極具潮汕特色嘅風乾魚，亦因輔以機器炮製而失去咗天然冬風吹乾嘅味道，由於潮州傳統飲食有式微嘅趨勢，故此有必要宣揚潮汕文化。
骨科名醫高永文都係「家己冷」，佢就推介一款名為「春餅」嘅潮州小食，而會董張俊勇同副會長胡劍江就喜愛甜絲絲嘅芋泥餅。保良局總理鄭錦鐘就話機會難逢，狂掃十多包魚蛋同韮菜餅，仲買多隻鹵水鵝返屋企加餸添。