中環出更：新舊喇沙仔做彌撒 賀母校80周年
喇沙書院尋日舉行八十周年紀念彌撒活動，作為傳統名校，唔少喇沙校友都係政商界名人，卓妮就見到香港律師會前會長黃嘉純同細佬黃嘉為、港區人大代表兼公民教育委員會主席李宗德及公務員敍用委員會主席吳榮奎。黃嘉純話，嘉為係忠實「喇沙迷」，又自爆當年做學生哥時整蠱同學仔，搞到人哋不斷受到電話騷擾，真係百厭。
黃嘉純愛整蠱同學
黃嘉純尋日同嘉為孖住去彌撒，黃嘉純一講起讀書時嘅趣事，不知幾興奮。佢話嗰時同孔教學院院長湯恩佳嘅公子係同學，大家好老友。不過，黃嘉純就好百厭，佢試過喺街度執咗張外語學校嘅報名表，跟住填咗湯公子個名同電話，幫湯公子報讀非洲語，搞到湯公子成日收到外語學校催促上堂咁話。
黃嘉為係現任喇沙舊生會主席，佢尋日就專登着咗為舊生設計嘅外套出席彌撒，而且仲擔任彌撒嘅「音樂總監」，彈完結他又彈琴。黃嘉純笑細佬係「喇沙迷」，皆因嘉為對喇沙書院好有感情，其車牌「LS 1932」係代表書院名同創校年份，佢仲花三、四年時間寫咗本書介紹書院歷史添。
卓妮同場仲見到李宗德及同屆嘅名醫史泰祖。李宗德話，自己讀書時成日同啲同學仔去玩，「邊同依家嗰啲成日去補習吖，我哋成日去Party（派對）o架！」咁係咪去識女仔呢？點知佢話男校派對冇女仔，但好彩家姐同細妹讀女校，先可以乘機去識下女仔喎。喇沙書院校長賀敬修士（Brother Steve Hogan）話，該校嚟緊仲會搞好多活動，喇沙仔就要密切留意喇。
卓妮