可喜可賀！可賀可喜！東方紅，太陽升，實實在在冇得頂！
因乜事幹功夫茶咁開心？無他嘅，人逢喜事精神爽，根據國際市場研究公司Oracle Added Value最新報告，《東方日報》同《太陽報》讀者人數創新高，合共超過五百萬，覆蓋全港七成半人口！
嗱嗱嗱，大家眼珠未跌落地之前，等功夫茶略略介紹呢間研究公司係乜嘢來頭。Oracle Added Value係全球四大國際市場研究公司之一，客戶多數係國際知名大集團同大機構，包括滙豐銀行、可口可樂、百事可樂、P & G等等跨國企業，權威性同公信力都毋庸置疑。
好嘞，睇下具體數據，Oracle Added Value調查顯示，《東方日報》連續三十五年高踞全港銷量第一寶座，王者地位絲毫無損之餘，更加再創報壇奇迹，讀者激增百分之八點五，人數超過三百七十三萬。
至於《太陽報》咯喎，除咗強勢穩佔香港第三大報位置，讀者增幅更加驚人，比率係百分之二十六點一。《太陽報》家陣嘅讀者人數超過一百六十三萬。《東方日報》加《太陽報》讀者總人數係幾多呀？冇錯嘞，答案係超過五百三十六萬。
至於爛果報又點呢？該煨咯，直情係水瓜打狗唔見一截，讀者人數銳減百分之五點四，現時只有二百四十萬多啲。唔怕唔識貨，只怕貨比貨，《東方日報》讀者人數比爛果報多一百三十萬。如果你計《東方》《太陽》雙劍合璧，讀者人數更加比爛果報多二百九十幾萬，大幅拋離九條街！
功夫茶曾經講過，《東方日報》加《太陽報》嘅讀者如果一字排開，可以繞地球一圈。條數係咁計嘅，地球赤道圓周大概四萬公里，只要每公里容納一百人，就可以排足四百萬人。呢個講法睇怕要修正，因為兩報讀者人數已經增加到五百三十六萬吖嘛，所以唔止繞地球一圈，而係繞完一圈仲有剩！
所以話啫，東方報業集團有三最，最多讀者，最大市場，最具代表性。既然東方有三最，假如你係尊貴嘅廣告客戶，你會點睇呢？計功夫茶話齋，聰明嘅你一定會毫不猶豫認為，《東方日報》同《太陽報》最得到龐大讀者信賴，唔揀兩報落廣告仲有乜嘢選擇喎！
大家唔好唔記得，東方報業集團仲有一個實力雄厚嘅網站on.cc，網站裏面又有電視ontv，節目多姿多采，新聞、評論、財經、娛樂、生活、體育乜都有。即係話，如果廣告對象係網民，on.cc同樣係信心保證。
東方讀者創新高，大幅拋離爛果報，功夫茶梗係要開香檳慶祝啦！