喺新大樓九樓嘅民主黨辦公室最近張貼嘅公告，裏面話大樓鼠患嚴重，所以提醒大家必須將食物封存好、將垃圾桶冚好，同埋用餐後將食具洗乾淨，總之就係要保持地方衞生清潔，唔好剩番啲食物用嚟養老鼠。
立法會綜合大樓鼠蹤處處，早有所聞，包括有人見到死老鼠，最離譜係秘書處剛搬去新大樓，有人食緊一份三文治，擺低一陣就竟然畀老鼠咬咗一啖，估唔到入伙咁耐，都仍然係「鼠患嚴重」，議員小心開開吓會嗰陣，有隻老鼠喺枱面行嚟行去，又或者人有人開會，老鼠又有老鼠開會！好多嘢唔係主觀願望想點就點，簡單如要杜絕鼠患，就搞極都搞唔掂。