政情：鄉紳力爭車公廟業權
新界鄉紳與政府之間嘅紛爭一浪接一浪，繼新界村屋僭建問題，搞到村民火燒發展局局長林鄭月娥嘅紙紮公仔，沙田原居民同民政事務局，隨時又會就沙田車公廟嘅業權爭議對簿公堂。沙田鄉事委員會將於今早召開村代表大會討論車公廟業權事宜，主席莫錦貴尋日警告，如果民政局再唔派人同佢哋傾，下次肯定就喺法庭見，不過佢哋就暫時未有計劃焚燒民政局局長曾德成嘅紙紮公仔。
本報早前獨家報道，沙田鄉委會質疑政府喺近八十年強搶本來屬於當區原居民嘅車公廟業權，近年積極進行追討，但係民政局方面一於少理，超過一年都拒絕正式答覆，認真冇禮貌同鬼祟。
莫錦貴重申，爭業權係為咗「正名」，希望市民知道車公廟係屬於沙田原居民，佢哋從冇諗過將間廟改做骨灰龕牟利，爭取成功的話亦一定會成立慈善信託基金，邀請政府監察車公廟嘅運作同收入。佢強調打官司冇人可以預知最後邊個贏，依家係埋枱傾嘅最好時機，最擔心係是但有個原居民自己走出嚟告政府，甚至採取更激烈行動，到時無論邊個出聲都未必得住：「個個都係持份者，一定唔少人肯行出嚟！」