香港教育學院爭取正名做大學已經有好幾年，但到依家都冇聲冇氣，搞到好多學生同教職員都好氣餒，埋怨身兼行政會議成員嘅校長張炳良冇出力幫教院爭取，有學生趁學校今日舉行學位頒授典禮，諗住整張大字報「招呼」張炳良同校監煲呔曾，點知就出事喇！
尋日朝有人發現喺教院大埔校園露天廣場地下，出現咗「校長，說好的大學呢？大學正名，遙遙無期」兩行白油髹出的大字，相信呢幾個字，係好多教院師生、校友嘅心聲，大家都好想問吓究竟教院幾時先可以成為名正言順嘅大學。不過，呢兩行大字喺短時間內就畀清潔工人清洗咗。
學校解釋話，學生原本想將大字印落塊黑布度，點知塊布太薄，搞到啲字嘅油漆滲透，印晒落地下。查實教院申請正名都有一定進展，話晒政府都願意資助教院開辦三個非教育學位課程，協助教院發展成為全方位大學，相信學生、教職員再耐心等候嘅話，一定等到正名呢日嘅。